Segundo o presidente do goberno español a crise migratoria de Europa débese a un problema demográfico. Non. A causa é a destrución colonial máis terríbel e prolongada da historia, que deixou a África sen esperanza.
Mais Sánchez é perspicaz: en 2050 o 40% dos nenos nacerán alí, os europeos seguiremos sendo 700 millóns mentres que eles pasarán a 2.500. Sendo desta maneira, afirma, ou se incentivan plans Marshall ben potentes, ou os condenados da terra virán e arrasarannos.
Falláronnos os cálculos. Durante decenios pensamos que había un ciclo demográfico antigo, de morte e reprodución sen control; outro (desde o S. XVII) de mortalidade baixa, pola hixiene e os remedios, pero coa natalidade desbocada e un terceiro, actual e definitivo, que todos celebrabamos: con el diminuía a reprodución no mundo, a poboación tendía a estabilizarse e o crecemento demográfico deixaba de ser un desafío para a especie. Pero os africanos van coñecendo os métodos anticonceptivos, non pensan aplicalos nin de broma e o edificio cartesiano treme polos alicerces.